Namanganda 9 yoshli bola shifoxonada vafot etdi
Uning o‘lim sababi nomaʼlum.
Bugun, 8-yanvar kuni Namangan viloyatining Chust tumanida 9 yoshli bola vafot etdi. Bu haqda viloyat Favqulodda vaziyatlar boshqarmasi xabar qildi.
Maʼlumotlarga ko‘ra, soat 11:22 da Chust tumani “Yorqishloq” MFY hududidagi xonadonlarning birida yashagan 9 hamda 4 yoshli bolalar sog‘lig‘i yomonlashib, tibbiyot xodimlari tomonidan shifoxonaga olib kelingan.
2014 yilda tug‘ilgan bola tuman tibbiyot birlashmasida birinchi yordam ko‘rsatilishiga qaramasdan vafot etgan. O‘lim sababi aniqlanmoqda.
“Yakuniy xulosa sud-tibbiy ekspertizasi xulosasidan so‘ng maʼlumot beriladi”, — deyiladi xabarda.
Hozirda sodir bo‘lgan holat yuzasidan tergovga qadar surishtiruv ishlari olib borilmoqda.
