Yevropada vaziyat dahshatli — Fumio Kisida
Yaponiya Bosh vaziri bunga urush sabab ekanini aytmoqda.
Ukraina atrofidagi vaziyat tufayli Yevropa dahshatli vaziyatga tushib qoldi. Bu haqda Yaponiya Bosh vaziri Fumio Kisida aytib o‘tdi.
Uning fikricha, bundan oldin Yevropaning gullab-yashnashi Rossiyadan keltiriladigan arzon energiya taʼminoti evaziga qurilgandi.
“Yevropa barqaror va arzon energiya taʼminotiga asoslangan holda ishlab chiqarishni yo‘lga qo‘ygan. Biroq Ukrainadagi mojaro Yevropa kelajagi haqidagi kartinani tubdan o‘zgartirdi, vaziyat dahshatli tus oldi”, — dedi Bosh vazir.
“Yaponiya o‘zining geografik xususiyatlaridan kelib chiqib, energiya resurslari importiga bog‘liq barcha mavjud imkoniyatlardan, jumladan, qayta tiklanadigan va atom energiyasidan foydalanishi kerak”, — deya xulosa qilgan u.
Eslatib o‘tamiz, Rossiya Ukrainada harbiy maxsus operatsiyasi boshlanganidan so‘ng G‘arb davlatlari Moskvaga nisbatan sanksiyalar bosimini kuchaytirdi. Ammo bu AQSH va Yevropaning o‘zida yonilg‘i narxining oshishi va rekord darajadagi inflyatsiyani keltirib chiqardi.
