Saudiya Haj va umra ishlari vaziri Samarqandga tashrif buyurish niyatida
Tavfiq bin Favzon ar-Rabia O‘zbekiston delegatsiyasi bilan uchrashuvda Imom Buxoriy majmuasida qurilayotgan Muhammad sollallohu alayhi vasallam siyratlariga oid innovatsion muzeyning ochilish marosimiga borish niyatida ekanini maʼlum qildi.
8-yanvar kuni Jidda shahrida O‘zbekiston delegatsiyasi Saudiya Arabistoni Podshohligi Haj va umra ishlari vazirligi rahbariyati o‘rtasida uchrashuv bo‘ldi.
Muloqotda Haj va umra ishlari vaziri Tavfiq bin Favzon ar-Rabia hamda Prezident maslahatchisi Muzaffar Komilov, Musulmonlar idorasi raisi, muftiy Nuriddin domla Xoliqnazarov va Din ishlari bo‘yicha qo‘mita raisi Sodiqjon Toshboyev ishtirokida o‘zaro aloqalarning istiqbollari hamda 2023 yilgi haj mavsumini yuqori darajada tashkil etish masalalari muhokama qilindi.
Uchrashuvda Prezident maslahatchisi Muzaffar Komilov O‘zbekiston va Saudiya Arabistoni Podshohligi o‘rtasidagi hamkorlik bosqichlari, haj va umra tadbirlarini tashkil etish rivojlanib borayotgani, so‘nggi yillarda ikki mamlakat o‘rtasidagi aloqalar taraqqiy etayotgani, O‘zbekiston Respublikasi Prezidenti Shavkat Mirziyoyevning 2022 yil avgust oyida ikki Muqaddas masjid xodimi, Podshoh Salmon bin Abdulaziz Ol Saud taklifiga binoan, davlat tashrifi bilan Saudiya Arabistoniga borishi hamkorlik munosabatlarini yana-da yuksak darajaga ko‘tarishga xizmat qilayotgani alohida qayd etdi.
Shuningdek, Muzaffar Komilov Haj va umra ishlari vaziri Tavfiq bin Favzon ar-Rabiaga nufuzli anjumanga taklif etgani va samimiy qabul uchun minnatdorlik bildirib, mazkur tashrif natijasida hamkorlik munosabatlarini yana-da takomillashtirish asosiy maqsad ekanini maʼlum qildi.
Vazir janoblari so‘nggi yillarda Saudiya Arabistoni va O‘zbekiston o‘rtasidagi hamkorlik aloqalari rivojlanib borayotgani, O‘zbekiston Respublikasi Prezidenti Shavkat Mirziyoyevning Saudiya Arabistoniga davlat tashrifi aloqalarni yangi bosqichga olib chiqqanini eʼtirof etdi.
Uchrashuvda O‘zbekiston musulmonlari idorasi raisi, muftiy Nuriddin domla Xoliqnazarov va Din ishlari bo‘yicha qo‘mita raisi Sodiqjon Toshboyev haj va umra ziyoratchilariga xizmat ko‘rsatish sifatini yana-da oshirish borasida fikr-mulohazalarini aytdi.
Muzokaralarda Madina shahridagi Payg‘ambarimiz Muhammad sollallohu alayhi vasallam siyratlariga oid innovatsion muzey kabi Samarqand viloyati Imom Buxoriy majmuasida ham mazkur buyuk muhaddis hayoti va ijodiga bag‘ishlangan muzey barpo etish ishlari jadal davom ettirilayotganini bayon qilindi. Vazir ushbu muzeyning ochilish marosimiga borish niyatida ekanini maʼlum qilgan.
