O‘zbekiston TIV avtomashinada harakatlanishdan voz kechishga chaqirdi
Bu bo‘yicha vazirlik ogohlantirish bilan chiqdi.
O‘zbekiston Respublikasi Tashqi ishlar vazirligi Qozog‘iston hududi bo‘ylab avtotransport vositalari va avtobus qatnovi orqali harakatlanishdan voz kechishishga chaqirdi.
Qayd etilishicha, ushbu mamlakatning barcha hududlarida noqulay ob-havo kuzatilayotgani bois avtotrassalarda kuchli sovuq tufayli qiyin vaziyatga tushib qolayotgan fuqarolardan murojaatlar kelib tushmoqda.
Diplomatik vakolatxonalar Qozog‘iston Respublikasidagi vatandoshlar hamda ushbu mamlakat tegishli idoralari bilan doimiy aloqada bo‘lib turibdi. Fuqarolarga zarur konsullik, huquqiy va amaliy yordam ko‘rsatilmoqda.
“Yuqoridagilarni inobatga olgan holda, O‘zbekiston fuqarolariga ob-havo sharoiti barqarorlashgunga qadar Qozog‘iston hududi bo‘ylab avtotransport vositalari va avtobus qatnovi orqali harakatlanishdan voz kechishlarini tavsiya qilamiz”, — deyiladi xabarda.
