Gruziya nima uchun Ukrainaga harbiy yordam bermaydi?
Mamlakat bosh vaziri o‘rinbosari bu masalaga oydinlik kiritdi.
Gruziya o‘zini Ukraina nizosiga tortilishiga yo‘l qo‘ymaydi. Bu haqda mamlakat bosh vaziri o‘rinbosari Teya Sulukiani maʼlum qildi.
Bundan avval Ukrainaning Gruziyadagi ishonchli vakili Andrey Kasyanov “Yevropa haqiqati” nashriga yozgan maqolasida Kiyev Tbilisidan 2008 yilda taqdim etilgan “Buk” tizimlarini qaytirishni so‘raganini yozgandi. Gruziya mudofaa vazirligi bunga rad javobini berib, texnika uchun bir necha million dollar to‘langanini maʼlum qilgan.
“Javob bitta — gruzin hukumati Gruziya davlatini harbiy qarama-qarshilikka tortishga bo‘lgan urinishlarga yo‘l qo‘ymaydi. Shuning uchun biz mojaroning hech qaysi tomoniga harbiy yordam bermaymiz”, – degan Sulukiani.
Tbilisi bundan avval ham Kiyevga harbiy yordam ko‘rsatishdan bosh tortgandi. Ukraina prezidenti ofisi rahbari maslahatchisi Mixail Podolyak esa Gruziyani qariyb bir yillik nizodan keyin ham kimning tarafida turishni bilmaslikda ayblagandi.
