Jizzaxda 8 ta avtomobil to‘qnashdi
YTHga uchragan avtomobillar orasida yo‘lovchi avtobusi ham bor.
Jizzax shahrida avtobus bir nechta avtomobillar bilan to‘qnashdi. Voqea 2023 yil 17 yanvar kuni soat 21:00 larda Jizzax shahar “Mustaqillik shoh” ko‘chasida sodir bo‘lgan. Holat yuzasidan YHXBB xabar berdi.
Unda “ANKAI” rusumli “Jizzax avtotrans servis” MCHJga qarashli yo‘lovchi tashuvchi avtobusni yo‘lovchilarsiz boshqarib ketayotgan haydovchi A.N. harakat davomida charchoq alomati bo‘lib, uxlab qolgan.
Oqibatda, rul boshqaruvini yo‘qotib “JizzaxPlasTex” korxonasi oldidagi avtomobillarga yoqilg‘i quyish shoxobchasida o‘zi bilan bir yo‘nalishda oldinda navbat kutib to‘xtab turgan haydovchi Q.A.ga tegishli “Damas”ning orqa qismiga kelib urilgan. Natijada, “Damas” avtomobili yo‘lning o‘ng tomon chetiga chiqib ag‘darilib ketgan hamda avtobus harakatini davom ettirib:
— haydovchi T.K.ga tegishli “Nexia-2” rusumli;
— haydovchi T.U.ga tegishli “Nexia-2” rusumli;
— haydovchi Z.Sh.ga tegishli “Cobalt” rusumli;
— haydovchi X.A.ga tegishli “Nexia-3” rusumli;
— haydovchi U.S.ga tegishli “Nexia-2” rusumli;
— haydovchi R.I.ga tegishli bo‘lgan “Lacetti” rusumli jami 7 ta transport vositalariga to‘qnashib YTH sodir etgan.
YTH natijasida “Damas” avtomobili haydovchisi, A.Q.ga birinchi tibbiy yordam ko‘rsatilib, ambulator tartibda davolanish uchun yashash manziliga yuborilgan.
Mazkur YTH yuzasidan Jizzax viloyati IIB JXX YHXB xodimlari tomonidan surishtiruv olib borilmoqda.
