“Prava” uchun imtihonda “soqqa” qiluvchilar ushlandi
Hozirda ularga nisbatan jinoyat ishi ochilgan.
Haydovchilik guvohnomasi olib berishni vaʼda qilgan firibgarlar ushlandi, deya xabar bermoqda Bosh prokuratura huzuridagi iqtisodiy jinoyatlarga qarshi kurashish departamenti.
Qayd etilishicha, departamentning Buxoro viloyati Vobkent tumani bo‘limi IIB xodimlari bilan hamkorlikda tezkor tadbir o‘tkazgan. Unda fuqarolar Sh.A., I.I. va M.R. fuqaro I.I.ni haydovchilik guvohnomasi olishi uchun bo‘ladigan imtihondan o‘tkazib qo‘yish evaziga 400 AQSH dollarini olgan vaqtlarida ashyoviy dalillar bilan ushlangan.
Qashqadaryo viloyati Koson tumanida o‘tkazilgan tergovga qadar tekshiruvda fuqaro N.X. fuqaro A.P.ni haydovchilik guvohnomasi olishi uchun bo‘ladigan imtihondan go‘yoki Ichki ishlar organlarida ishlovchi tanishi yordamida o‘tkazib qo‘yish evaziga 2,2 mln so‘mini qo‘lga kiritganligi aniqlanib, shundan 2 mln so‘mni qaytarganligi protsessual tartibda rasmiylashtirilgan.
Shuningdek, departamentning Qoraqalpog‘iston Respublikasi boshqarmasi tomonidan ham tezkor tadbir o‘tkazilgan. Unda fuqaro b.Sh. fuqaro S.K.ni haydovchilik guvohnomasi olish uchun bo‘ladigan imtihondan tanishlari yordamida o‘tkazib qo‘yish evaziga 2 mln so‘mni olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
