Navoiyda o‘rdaklar sovuq sabab ko‘lga yopishib qoldi
Holat yuzasidan viloyat ekologiya boshqarmasi maʼlumot berdi.
Ijtimoiy tarmoqda Navoiy shahridagi “Yoshlik” ko‘lida o‘rdaklar sovuq sababli suvga yopishib qolgani haqida xabarlar tarqaldi. Holat yuzasidan viloyat ekologiya boshqarmasi rasmiy munosabat bildirdi.
Qayd etilishicha, o‘rganish davomida qushlarning nobud bo‘lganlari bor yoki yo‘qligini aniqlash maqsadida dron uchirilib, qushlar joyidan qo‘zg‘atilgan.
Dron tasvirlariga ko‘ra, qushlar orasida nobud bo‘lganlari mavjud emasligi aniqlangan. Shuningdek “Yoshlik” ko‘lida bugungi kunda yovvoyi o‘rdaklar qishlamoqda.
Sovuq kunlarda qushlar nobud bo‘lishining oldini olish maqsadida joriy yilning 18 yanvar kuni Navoiy viloyati Ekologiya boshqarmasi xodimlari tomonidan ko‘l atrofiga don sochilgan.
