Sirdaryoda ko‘pkari uchun sovringa bo‘ri qo‘yishmoqchi bo‘ldi
Holat yuzasidan vazirlik munosabat bildirdi.
Ijtimoiy tarmoqlarda Sirdaryoda o‘tkaziladigan ko‘pkari uchun Zomin qo‘riqxonasidan bo‘ri olib kelinishi haqida videoxabar tarqaldi. Holat yuzasidan Tabiat resurslari vazirligi rasmiy munosabat bildirdi.
Sirdaryo viloyati Ekologiya boshqarmasi hamda Ichki ishlar xodimlarining o‘rganishlarida videotasvirdagi fuqarolardan biri Xovos tumanining “Istiqlol” MFYda yashovchi fuqaro Sh.R ekanligi aniqlangan.
Sh.R ko‘pkariga sovrin uchun bo‘ri qo‘yishni maqsad qilgani, videotasvirdagi holat Jizzax viloyatining Zomin tumanida tasvirga olingani va bo‘ri ushbu tumanda yashovchi fuqaro E.A.ning uyida saqlanayotganini bildirgan. Holat yuzasidan belgilangan tartibda hujjatlar rasmiylashtirilib, Jizzax viloyati Ekologiya va Ichki ishlar boshqarmalari xodimlariga tegishli maʼlumotlar taqdim qilingan.
Shundan so‘ng Zomin tumani Ekologiya bo‘limi va ichki ishlar xodimlari tomonidan olib borilgan o‘rganishlar davomida “Turkman” MFYda yashovchi K.G‘. ismli fuqaro o‘z xonadonida bo‘rini noqonuniy tarzda tutqunlikda saqlab kelayotganligi aniqlangan. Ushbu fuqaro bu harakati bilan O‘zbekiston Respublikasining “Hayvonot dunyosini muhofaza qilish va undan foydalanish to‘g‘risida”gi Qonunining 4, 32, 33-moddalari talablarini buzgan.
Mazkur fuqaroga nisbatan O‘zbekiston Respublikasi MJtKning 90-moddasi, 1-bandiga asosan BHMning 10 baravari — 3 mln so‘m miqdorida jarima belgilangan.
“Davlat inspektorlari tomonidan bo‘rining holati ko‘zdan kechirilganda jonivor sog‘lom ekanligi maʼlum bo‘ldi. Shundan so‘ng bo‘ri tabiat bag‘riga qo‘yib yuborildi”, — deyiladi xabarda.
