Surxondaryoda isteʼmolga yaroqsiz go‘sht mahsulotlari aniqlandi
Viloyat IIB go‘sht egasiga qanday chora ko‘rilganini maʼlum qildi.
Surxondaryo viloyatida 26-yanvar kuni avtomashinada olib ketilayotgan sifatsiz go‘sht mahsulotlari aniqlandi. Bu haqda viloyat IIB axborot xizmati xabar bermoqda.
Qayd etiilishicha, “Darband” YPX maskanida Oziq-ovqat xavfsizligini taʼminlash bo‘yicha reyd tadbiri o‘tkazilgan. Tadbir davomida Sho‘rchi-Toshkent yo‘nalishi bo‘yicha harakatlanib kelayotgan fuqaro K.J. boshqaruvidagi Cobalt rusumli avtomashina to‘xtatilgan. Transport vositasining yukxonasi tekshirilganda unda veterinariya hujjatlarisiz 103 kg yirik shoxli mol go‘shti olib ketilayotgani aniqlangan.
Go‘sht mahsulotlari Boysun tuman laboratoriyasida isteʼmolga yaroqli yoki yaroqsiz ekanligini aniqlash maqsadida tekshiruvdan o‘tkazilgan. Tekshiruv xulosasiga ko‘ra, ular isteʼmolga yaroqsiz ekanligi maʼlum bo‘lgan. Hozirda go‘sht mahsuloti egasiga nisbatan Maʼmuriy javobgarlik to‘g‘risidagi kodeksning 109-moddasiga asosan bayonnoma rasmiylashtirilgan hamda nomaʼlum sharoitda so‘yilgan mol go‘shti belgilangan tartibda yo‘q qilingan.
