Qarib quyilmagan o‘yin jinnisi
Tayvanda 74 yoshli otaxon hamon “Pokemon Go” o‘yini bilan band.
Bir paytlar mashhur bo‘lgan “Pokemon Go” o‘yini yodingizda bo‘lsa kerak? Bu o‘yinning davri o‘tib ketgan deb o‘ylasangiz, adashasiz.
Tayvanda yashovchi Chen San-Yuan ismli keksa kishi haliyam bu o‘yindan voz kecha olmayapti. Buning ustiga u o‘yinga juda jiddiy munosabatda bo‘ladi.
San-Yuan 2016 yildayoq nevarasi u haqda ijtimoiy tarmoqda so‘zlab berganida mashhur bo‘lgan. Oradan ikki yil o‘tib, u yana tillarga tushdi. Chunki o‘sha paytda otaxon o‘yin uchun 8 ta telefondan foydalanardi.
Hozir esa 74 yoshli erkak “ovga” velosipedda chiqadi. Uning trasporti naqd 64(!) ta smartfon bilan jihozlangan. Qariya dunyodagi barcha Pokemonlarni ushlashga ahd qilgan ko‘rinadi.
