Hududlarda gaz zaxirasi yetarlimi?
Energetika vazirligi masʼul xodimi hozirda hududlarda mavjud gaz zaxirasi haqida maʼlumot berdi.
AOKAda o‘tkazilgan brifingda Energetika vazirligi masʼul xodimi Obidjon Dilmurodov maʼlum qilishicha, 29 yanvar kuni elektr stansiyalar orqali 222 mln 500 ming kVt-soat elektr energiyasi ishlab chiqarildi. Respublika isteʼmolchilariga 217 mln 700 ming kVt-soat elektr energiyasi yetkazib berildi.
Shuningdek, gaz taʼminoti korxonalari tomonidan isteʼmolchilarga 145 mln 400 ming kub metr tabiiy gaz va 1100 tonna suyultirilgan gaz yetkazib berildi. Hozirda hududlarda 2 500 tonna suyultirilgan gaz hamda 23 500 dona gaz ballonlari zaxirasi mavjud.
Aholi va byudjet tashkilotlarini ko‘mir mahsulotlari bilan taʼminlash maqsadida 3 ming 400 tonna ko‘mir hududlardagi omborlarga ortib yuborildi.
Korxonalarda qazib chiqarish va ishlab chiqarish ishlari o‘rnatilgan tartibda olib borilmoqda. Barcha korxonalarda shtablar tuzilgan, 24 soatlik navbatchilik tashkil qilingan.
Zarur chora sifatida respublikamizning ayrim hududlarida elektr taʼminotida bir yarim soatdan ikki soatgacha cheklovlar kiritildi.
Ko‘rilgan choralar natijasida elektr tarmoqlarida yuzaga kelgan nosozliklarni to‘liq bartaraf etishga erishildi.
Gaz tarmoqlarida tabiiy gaz bosimi ko‘tarilishi natijasi 1 kunda 11 ta mahalladagi 12 ming 784 ta xonadonning tabiiy gaz taʼminoti yaxshilandi.
Bugungi kunda Toshkent, Farg‘ona, Andijon, Namangan, Samarqand, Surxondaryo, Buxoro, Jizzax va Sirdaryo viloyatlarining ayrim xonadonlarida gaz bosimini meʼyorga keltirish ishlari davom ettirilmoqda.
Gaz tarmoqlarida sodir bo‘layotgan nosozliklarni bartaraf etish ishlari isteʼmolchilarni oldindan ogohlantirgan holda amalga oshirilmoqda.
Shuningdek, vazirlik va tizim tashkilotlarining masʼul xodimlari hududlarga safarbar etilgan bo‘lib, isteʼmolchilarni barqaror energiya resurslari bilan taʼminlash bo‘yicha zarur choralar ko‘rilmoqda.
Tarmoqlarda yuzaga kelishi mumkin bo‘lgan va kuzatilayotgan nosozliklarni bartaraf etish maqsadida elektr va gaz taʼminoti korxonalarida tunu-kun ishlaydigan 1 000 dan ortiq maxsus brigadalar tashkil etilgan bo‘lib, ular joylarda muammolarni tezkorlik bilan bartaraf etilishini taʼminlamoqda.
