Pokistonda masjid portlatildi
Oqibatda 100 dan ortiq kishi jarohatlangan.
Pokistonning Peshovar shahridagi masjidda yuz bergan portlash oqibatida 28 kishi halok bo‘ldi. Bu haqda “Korrespondent” nashri yozmoqda.
Taʼkidlanishicha, yana 150 kishi kasalxonaga yotqizilgan, ulardan baʼzilarining ahvoli og‘ir. Yaradorlar orasida huquq-tartibot idoralari xodimlari ham bor.
Peshovar politsiyasi boshlig‘i so‘zlariga ko‘ra, masjid politsiya shtab-kvartirasi va terrorizmga qarshi kurash bo‘limini o‘z ichiga olgan majmuada joylashgan. Uning qo‘shimcha qilishicha, xudkushlik hujumi ehtimolini inkor etib bo‘lmaydi – masjid ichidan portlovchi moddalar izi topilgan.
Masjidning bir qismi qulagan, vayronalar ostida hamon odamlar bo‘lishi mumkinligi taxmin qilinmoqda. Hozircha hech qaysi tashkilot hujum uchun javobgarlikni o‘z zimmasiga olgani yo‘q.
