Surxondaryoda YPX xodimiga pora berayotgan haydovchi qo‘lga tushdi
U avtomashinasini jarima maydonchasidan chiqarish uchun shunday qilgan.
Surxondaryo viloyatining Qumqo‘rg‘on tumanida yo‘l-patrul xizmati xodimiga pora taklif etgan haydovchi tezkor tadbirda qo‘lga olindi. Bu haqda viloyat IIB axborot xizmati xabar berdi.
Qayd etilishicha, YPX xodimlari — Sh.Sharipov va A.Yuldashevlar tunda Qumqo‘rg‘on tumani Bog‘aro mahallasi hududida xizmat olib borayotganida Nexia-1 rusumli avtomashinani to‘xtatib, hujjatlarini tekshirib ko‘rmoqchi bo‘ladi. Shu payt avtomashina haydovchisi T.H.dan spirtli ichimlik hidi kelib turganini sezgach, uni xizmat yuzasidan biriktirilgan alkotester moslamasi orqali tekshiruvdan o‘tkazadi. Moslama haydovchining alkogol mastlik holatida ekanini aniqlaydi.
Mazkur holat bo‘yicha safdor A.Yuldashev T.H.ga nisbatan MJtKning 131-moddasi 1-qismiga muvofiq elektron tarzda maʼmuriy bayonnoma rasmiylashtirib, transport vositasini jarima maydonchasiga joylashtiradi. Shundan so‘ng T.H. safdor Sh.Sharipovdan o‘ziga nisbatan rasmiylashtirilgan maʼmuriy bayonnomadagi huquqbuzarlikni bekor qilib, avtomashinani jarima maydonchasidan chiqarib bersa, evaziga 6 million so‘m pul berishini taklif qilgan. Safdor Sh.Sharipov huquqbuzar haydovchiga uning bu harakati jinoyat ekani va jinoiy javobgarlik mavjudligini tushuntirishiga qaramasdan T.H. pora taklif qilishda davom etgan.
Xodimning tegishli bildirgisi asosida o‘tkazilgan tezkor tadbirda T.H. Qumqo‘rg‘on tumani Surxon sohili mahallasi hududida safdor Sh.Sharipov boshqaruvidagi Nexia-3 rusumli xizmat avtomashinasining old yo‘lovchi o‘rindig‘iga o‘tirib, 6 million so‘m pulni pora tariqasida bergan vaqtda tadbir ishtirokchilari qo‘liga tushgan.
Ushbu holat yuzasidan Bosh prokuratura huzuridagi Iqtisodiy jinoyatlarga qarshi kurashish departamentining Qumqo‘rg‘on tumani bo‘limi Jinoyat kodeksining 211-moddasi 1-qismi bilan jinoyat ishi qo‘zg‘atib, tergov harakatlarini olib bormoqda.
