2 ta viloyatda fermer yerlari o‘zboshimchalik bilan egallab olindi
Birida uy, birida chorvaga mo‘ljallangan bino qurilgan.
Fermer xo‘jaliklari ekin yer maydonlarini egallab olish holatlari aniqlandi, deya xabar bermoqda Bosh prokuratura huzuridagi IqtisodiY jinoyatlarga qarshi kurashishi departamenti.
Qayd etilishicha, departamentning Muzrabot tuman bo‘limi tomonidan tergovga qadar tekshiruv o‘tkazilgan. Unda fuqaro N.A. “F.X.” fermer xo‘jaligining sug‘oriladigan ekin yer maydonining 20 sotixini o‘zboshimchalik bilan egallab olib, jami 98 kvadrat metr suvli yer maydonida 5 xonali uy-joy qurilishini amalga oshirayotgani aniqlangan.
Shuningdek, departamentning Shofirkon tuman bo‘limi tomonidan o‘tkazilgan tergovga qadar tekshiruvda fuqaro M.O. “R.J.” fermer xo‘jaligiga qarashli yuqori bonitetli sug‘oriladigan yer maydonining 7 sotixini o‘zboshimchalik bilan egallab olib, yerning unumdor qatlamiga zarar yetkazgan holda chorvaga mo‘ljallangan bino qurganligi aniqlangan.
Mazkur holatlar yuzasidan Jinoyat kodeksining 229-1-moddasi (yer uchastkalarini o‘zboshimchalik bilan egallab olish) bilan jinoyat ishlari qo‘zg‘atilib, tergov harakatlari o‘tkazilmoqda.
