Elektron shahodatnomalarni berish tartibi belgilandi
Ushbu hujjat o‘zbek va ingliz tillarida shakllantiriladi.
Kecha, 31-yanvar kuni Hukumat qarori bilan Umumiy o‘rta taʼlim to‘g‘risidagi elektron shahodatnomalarni berish tartibi haqidagi nizom tasdiqlandi.
Nizomga ko‘ra, bitiruvchilarga quyidagi turdagi shahodatnomalar beriladi:
—tayanch o‘rta taʼlim to‘g‘risida shahodatnoma (9-sinf);
—tayanch o‘rta taʼlim to‘g‘risidagi aʼlo darajali shahodatnoma (9-sinf);
—umumiy o‘rta taʼlim to‘g‘risidagi shahodatnoma (11-sinf);
—umumiy o‘rta taʼlim to‘g‘risida (kumush medal bilan) shahodatnoma (11-sinf);
—umumiy o‘rta taʼlim to‘g‘risidagi aʼlo darajali (oltin medal bilan) shahodatnoma (11-sinf);
—psixik rivojlanishida nuqsoni bo‘lgan bolalar uchun ixtisoslashtirilgan maktabni (maktab-internat) tamomlaganlik to‘g‘risidagi sertifikat.
Shahodatnoma o‘zbek va ingliz tillarida shakllantiriladi.
Buyurtma berish va shahodatnomani shakllantirish “Elektron shahodatnoma” axborot tizimi orqali amalga oshiriladi.
Bunda har yili 1-dekabrgacha bitiruvchi haqida tegishli maʼlumotlar platformaga kiritilib, buyurtma shakllantiriladi.
Shahodatnomalar bitiruvchilarga har yili 20-iyunga qadar beriladi.
Bitiruvchilar shahodatnomani elektron platformadan shaxsini tasdiqlovchi hujjatlar to‘g‘risidagi maʼlumotlarni kiritish orqali bepul yuklab oladi.
Qarorga ko‘ra, 2022/2023-o‘quv yili yakunidan “Elektron shahodatnoma” axborot tizimiga bitiruvchilar haqidagi maʼlumotlar kiritib boriladi.
