Respublika ishchi guruhi o‘z faoliyatini Qashqadaryo va Surxondaryo viloyatlarida davom ettirmoqda
Davlatimiz rahbari topshirig‘iga asosan tuzilgan Respublika ishchi guruhi o‘z faoliyatini Qashqadaryo viloyatining Qamashi hamda Surxondaryo viloyatining Bandixon tumanlarida davom ettirmoqda.
Davlatimiz rahbari topshirig‘iga asosan tuzilgan Respublika ishchi guruhi o‘z faoliyatini Qashqadaryo viloyatining Qamashi hamda Surxondaryo viloyatining Bandixon tumanlarida davom ettirmoqda.
Guruh tarkibiga 19 ta vazirlik va idoralar, viloyat, tuman sektorlari, sohaviy tashkilotlar rahbarlari kiritilib, joylarda “tezkor shtablar” tuzildi.
Faoliyat avvalida Qashqadaryo va Surxondaryo viloyatlari sektor rahbarlari hamda masʼullar uchun “mahallabay” yurib, uyma-uy ishlash bo‘yicha maxsus o‘quv-seminarlari tashkil etildi.
Respublika ishchi guruhi “Oqqo‘rg‘on tajribasi” asosida tumanlarda aholi muammolari va ijtimoiy-iqtisodiy masalalarni hal etishda “xonadonbay” kesimida ish olib borilmoqda.
Xo‘sh, o‘tgan uch kun davomida ishchi guruh faoliyatida qanday natijalar bo‘ldi?
Qamashi tumanida 60 ta mahallada 52 357 ta xonadon va 1 171 ta ijtimoiy soha va boshqa obyektlarda o‘rganish olib borildi.
Aniqlangan muammolarni hal etish maqsadida qator amaliy ishlar amalga oshirildi. Jumladan, uch kun davomida 45,7 km mahalla ichki yo‘llar shag‘allashtirildi. Elektr taʼminotini yaxshilash maqsadida 3 ta yangi transformator o‘rnatildi, eskilari taʼmirlandi, 1,2 km elektr simlar yangisiga almashtirildi, 40 dona beton ustunlar o‘rnatildi.
Ichimlik suvi masalasida 1 243 ta aholi xonadonlarini ichimlik suvi bilan taʼminlash maqsadida 10,9 km suv quvurini yotqizish ishlari boshlandi. 1405 dan ortiq aholi xonadonlariga 374 tonna bepul ko‘mir tarqatildi.
770 nafar fuqarolarning bandligini taʼminlashga ko‘maklashildi. Jumladan, 416 nafar ishsiz fuqarolar doimiy ishga joylashtirildi, 146 nafari kasb-hunarga o‘qitishga yo‘naltirildi, 208 nafar fuqarolar o‘zini o‘zi band qilishi bo‘yicha davlat ro‘yxatidan o‘tkazildi. 79 nafar tadbirkor va fuqarolarga 2,3 mlrd. so‘m kredit mablag‘i, xususan, 70 nafar talabalarga 580 mln. so‘m taʼlim krediti ajratildi. 81 nafar ishsiz fuqarolarga 261 mln. so‘mlik asbob-uskuna (tikuv mashinasi, pishiriq pechi) yetkazib berildi. 4 nafar fuqaroning uy-joyini taʼmirlash ishlari boshlandi.
Bandixon tumanida ham qator ijobiy ishlar amalga oshirildi. 22 ta mahallada 15 100 ta xonadon, 2 589 ta ijtimoiy soha va boshqa obyektlar to‘liq o‘rganildi.
Natijada, 73,2 km ichki yo‘llar shag‘allashtirildi, 3,5 km yo‘llarga to‘kilgan shag‘al tekislandi. Elektr taʼminotini yaxshilash maqsadida, 1 dona yangi transformator, 153 ta temir beton tayanchlar o‘rnatildi, 2,2 km tarmoq tortish ishlari, 12 ta transformator punktlarida taʼmirlash ishlari olib borilmoqda. Aholiga 158,4 tonna ko‘mir yetkazildi, kam taʼminlangan oilalarga 51 tonna ko‘mir bepul tarqatildi. Ichimlik suvi taʼminotini yaxshilash maqsadida “Bandixon”, “Chinor”, “Birdamlik” mahallalariga 6,3 km tarmoq tortish ishlari boshlandi.
Umumtaʼlim maktablarining isitish tizimlari ko‘rikdan o‘tkazilib, 10 ta maktabga 22 ta isitish qozonlari o‘rnatildi, 8 tasida isitish tizimi taʼmirlandi. 3 ta umumtaʼlim maktablariga quyosh panellari o‘rnatildi.
Xatlov jarayonida 26 nafar yoshlarning yashash sharoiti og‘irligi, bir qator muammolari borligi aniqlangan bo‘lib, 18 nafari “Yoshlar daftari”ga kiritildi. 10 nafariga turli yordamlar ko‘rsatildi.
“Har bir oila tadbirkor” dasturi doirasida tavsiyalar asosida 44 nafar fuqaroga 1,3 mlrd. so‘m imtiyozli kreditlar ajratildi. 117 nafar fuqarolarga 401 mln. so‘mlik 9 turdagi (to‘g‘ri chokli va overlok tikuv mashinalari, motokultivator, payvandlash uskunasi, mikser, elektr pech, gilam to‘qish uskunasi, kompyuter jamlanmasi, issiqxona) mahsulotlar subsidiya asosida berildi. 137 nafar fuqarolarning bandligiga ko‘maklashildi. Shundan, 78 nafari doimiy ish bilan taʼminlandi, 26 nafari haq to‘lanadigan jamoat ishlariga jalb etildi, 18 nafar fuqaro kasb-hunarga o‘qitildi, 15 nafariga ishsizlik nafaqasi tayinlandi.
“Saxovat va ko‘mak” jamg‘armasidan 231 nafar ehtiyojmand oilalarga moddiy yordamlar ko‘rsatildi. O‘ta og‘ir sharoitdagi 10 nafar oila uchun uy-joy qurilishi boshlandi, 4 nafar oilaning uy-joylari taʼmirlanmoqda.
