TDTU talabasi ozodlikdan mahrum qilindi
U Telegramda diniy qo‘shiq yuklab olib, boshqalarga tarqatgan.
Toshkent davlat texnika universitetining 4-kurs talabasi ozodlikdan mahrum qilindi. Bu haqda Toshkent shahar sudlari xabar berdi.
30 yanvar kuni jinoyat ishlari bo‘yicha Olmazor tuman sudining ochiq sud majlisida Jinoyat kodeksining 244-1-moddasi (jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish) 3-qismining “G” bandi ayblangan S. R.ga oid jinoyat ishi ko‘rib chiqilgan.
Maʼlum bo‘lishicha, S. R. dinga bo‘lgan qiziqishlari zamirida o‘zi foydalangan telefon apparatining Telegram ilovasidagi sahifasi orqali “VK music bot” orqali ko‘chirib olingan aqidaparastlik g‘oyalari bilan yo‘g‘irilgan audioqo‘shiq (nashida)ni tanishiga tarqatish maqsadida yuborib, internet jahon axborot tarmog‘idan foydalanib tarqatgan.
Vazirlar Mahkamasi huzuridagi Din ishlari bo‘yicha qo‘mita xulosasiga ko‘ra, S. R. tarqatgan diniy qo‘shiq (nashida) aqidaparastlik g‘oyasi bilan yo‘g‘rilgan bo‘lib, bu kabi diniy materialni O‘zbekiston hududiga olib kirish, tayyorlash va tarqatish taqiqlanganligi ko‘rsatilgan.
Sudlanuvchi sud majlisida dastlabki tergov jarayonida qiynoqqa solinganligi haqida ko‘rsatma bermagan va vajlar keltirmagan.
Jinoyat kodeksining 244-1-moddasi 3-qismida nazarda tutilgan jinoyatni sodir etganlik uchun qonunda 5 yildan 8 yilgacha ozodlikdan mahrum qilish jazosi belgilangan. S. R.ga nisbatan Jinoyat kodeksining 57-moddasini qo‘llab, modda sanksiyasida nazarda tutilgan jazodan ham kamroq jazo tayinlash uchun asoslar yetarli bo‘lmagan.
“Davlat ayblovchisining muzokara nutqida qancha jazo muddati yoki qanday jazo turi so‘raganligi aybdor shaxsga jazo tayinlashda muhim omil hisoblanmaydi.
Birinchi instansiya sudining hukmi qonuniy kuchga kirmagan bo‘lib, ushbu hukmdan norozi bo‘lgan taqdirda apellyatsiya shikoyati (protesti) qonunchilikda belgilangan tartib va muddatda berilishi mumkin”, — deyiladi xabarda.
