Germaniya Rossiyaning aybini isbotlay olmayapti
Gap “Shimoliy oqim” gaz quvurining portlashi haqida ketmoqda.
Germaniya bosh prokurori Peter Frankning aytishicha, hozirda nemis tergovchilarida “Shimoliy oqim” va “Shimoliy oqim—2” gaz quvurlaridagi portlashlar ortida Rossiya turganiga oid hech qanday dalil yo‘q.
“Hozirda buni isbotlashning iloji yo‘q, tergov davom etmoqda”, — dedi Frank.
Uning so‘zlariga ko‘ra, ikkita tadqiqot kemasi yordamida suv va tuproq namunalari, shuningdek, Daniya va Shvetsiyaning eksklyuziv iqtisodiy zonalarida joylashgan tegishli portlash joylaridan quvurlar qoldiqlari olingan.
“Biz hozirda bularning barchasini sud-tibbiyot ekspertizasi nuqtayi nazaridan baholayapmiz”, — deya taʼkidladi Germaniya bosh prokurori.
Shu bilan birga, u Daniya va Shvetsiya hodisa yuzasidan o‘z tekshiruvlarini olib borayotganini eslatdi.
Avvalroq Germaniya kansleri Olaf Shols Germaniya “Shimoliy oqim” va “Shimoliy oqim—2” gaz quvurlaridagi qo‘poruvchilik mavzusida dalilsiz spekulyatsiya qilish niyatida emasligini maʼlum qilgandi.
2022 yil 27 sentyabrda Nord Stream “Shimoliy oqim” va “Shimoliy oqim—2” dengiz gaz quvurlarining uchta tarmog‘ida “misli ko‘rilmagan vayronagarchilik” yuz berganini eʼlon qildi. Shvetsiyalik seysmologlar 26 sentyabr kuni quvur yo‘llari bo‘ylab ikkita portlashni qayd etdi. Rossiya Federatsiyasi Bosh prokuraturasi gaz quvurlariga shikast yetkazilganidan keyin xalqaro terrorchilik akti bo‘yicha ish qo‘zg‘atdi.
