Buxoroda noqonuniy diniy taʼlim beruvchilar aniqlandi
Holat yuzasidan IIB maʼlumot berdi.
Buxoro viloyatining Peshku tumanida 31 yanvar kuni noqonuniy diniy taʼlim o‘rgatish bilan shug‘ullanayotgan o‘quv markazi aniqlandi. Bu haqda viloyat IIB axborot xizmati xabar bermoqda.
Qayd etilishicha, 1987 yilda tug‘ilgan S.Sh. va 1990 yilda tug‘ilgan X.B.lar tashkil etgan «Misvoh» nomli o‘quv markazida arab tilini o‘rgatish bahonasida 9 nafar voyaga yetmagan yoshlar va 19 nafar katta yoshdagi shaxslarga qonunga xilof ravishda diniy taʼlim berib kelinayotgani aniqlangan.
Bundan tashqari, 1993 yilda tug‘ilgan T.M. Telegram messenjerida “Muslimalar” nomli virtual guruh tashkil qilib, 8 nafar fuqarolarga onlayn tarzda diniy taʼlim berayotganligi aniqlangan.
O‘tkazilgan surishtiruv tadbirlari jarayonida T.M. rasmiy hujjatlari bo‘lmagan holda arab tilini o‘rgatish bahonasida noqonuniy ravishda diniy taʼlim berib kelayotgani maʼlum bo‘lgan.
Javobgar shaxslar O‘zbekiston Oliy sudi tomonidan faoliyati taqiqlangan «Sodiq Samarqandiy»ning maʼruzalarini ijtimoiy tarmoqlar orqali tarqatib kelgan.
“Ushbu fuqarolarning xatti-harakatlarida O‘zbekiston Respublikasi Maʼmuriy javobgarlik to‘g‘risidagi kodeksning 241-moddasida (Diniy taʼlimotdan saboq berish tartibini buzish) ko‘zda tutilgan noqonuniy harakatlar mavjud”, — deyiladi xabarda.
