Buxoroda voyaga yetmagan qiz mashina o‘g‘irladi
Hozirda unga nisbatan jinoyat ishi ochilgan.
Buxoro viloyatining Vobkent tumanida 17 yoshli qiz mashina o‘g‘irladi. Bu haqda viloyat IIB axborot xizmati xabar bermoqda.
Joriy yilning 2 fevralidan 3 fevraliga o‘tar kechasi nomaʼlum shaxs Vobkent tumani «Xalach» mahallasida fuqaor R.E. ga tegishli «Damas» rusumli avtomashinasini o‘g‘irlab olib qochgan.
Mazkur holat yuzasidan viloyat ichki ishlar boshqarmasi tomonidan “to‘sib ushlash” maxsus tezkor rejasi harakatga keltirilib, ushbu avtomashina xalqaro ahamiyatga ega bo‘lgan A-380 avtomobil yo‘lining 69-kilometrida to‘xtatib ushlangan.
Aniqlanishicha, mazkur jinoyatni jabrlanuvchining mahalladoshi — 2005 yilda tug‘ilgan T.Sh. ismli voyaga yetmagan qiz sodir etgan.
Holat yuzasidan Jinoyat Kodeksining 267-moddasi 2-qismi bilan jinoyat ishi qo‘zg‘atilib, hozirgi kunda dastlabki tergov harakatlari olib borilmoqda.
