O‘zbek–afg‘on chegarasida yirik yong‘in chiqqani aytildi
Holat yuzasidan hokimlik bayonot berdi.
Ijtimoiy tarmoqda o‘zbek–afg‘on chegarasida yirik yong‘in sodir bo‘layotgani aks etgan videolar tarqaldi. Holat yuzasidan Surxondaryo viloyati hokimligi rasmiy bayonot eʼlon qildi.
Qayd etilishicha, O‘zbekiston va Afg‘oniston davlatlari chegarasidagi neytral hududda joylashgan Amudaryo ichkarisidagi kichik orolchalarda paydo bo‘lgan qamishzorlarda turli kasalliklar tashuvchisi hisoblangan zararkunanda hasharotlar ko‘payishi va yuqumli kasalliklar tarqalishining oldini olish uchun rejali tartibda yoqish ishlari olib borilmoqda.
Mazkur tadbir mutasaddi idoralar ruxsati hamda masʼul organlarning o‘zaro kelishuvi asosida amalga oshirilib, orolchalardagi yong‘in harakatlari va ko‘lami to‘liq nazoratga olingan.
“Ushbu tadbir yovvoyi qamishzorlarda belgilangan rejaga muvofiq olib borilayotganini maʼlum qilib, fuqarolardan ortiqcha vahimaga berilmaslikni, ijtimoiy tarmoq foydalanuvchilaridan esa aholi o‘rtasida vahima keltirib chiqaruvchi yolg‘on axborotlarni tarqatmaslikni so‘raymiz”, — deyiladi xabarda.
