Bayden 20-fevral kuni Polshaga boradi
Tashrif Rossiya bosqinining bir yilligi arafasida amalga oshirilmoqda.
AQSH Prezidenti Jozef Bayden 20-22-fevral kunlari Polshaga boradi. Bu haqda Oq uy maʼlum qildi.
Bundan oldin polyak hukumati bu bo‘yicha Amerika yetakchisiga rasmiy taklif jo‘natgani aytilgandi. Rossiyaning Ukrainaga qarshi bosqini bir yilligi arafasida bu ramziy ahamiyatga ega bo‘lishi mumkin.
Oq uy rahbari Polsha Prezidenti Anjey Duda va "Buxarest to‘qqizligi" davlatlari (Bolgariya, Vengriya, Estoniya, Latviya, Litva, Ruminiya, Slovakiya va Chexiya) yetakchilari bilan muzokara o‘tkazadi.
Shuningdek, AQSH Prezidenti Polshada Vladimir Zelenskiy bilan ham uchrashishi mumkin. Bu haqda avvalroq bir qator nashrlar xabar bergandi, ammo shu paytgacha bu rasman tasdiqlanmagan.
