Rossiya keskinlikni davom ettirishga qaror qildi — Makron
Fransiya Prezidenti Putin bilan muzokara olib borish vaqti emasligini aytdi.
Rossiya bilan tinchlik muzokaralari olib borishning iloji yo‘q, chunki u keskinlikni davom ettirishga qaror qildi. Bu haqda Fransiya Prezidenti Emmanuel Makron Myunxen xavfsizlik konferensiyasida aytib o‘tdi.
“Hozir muloqot vaqti emas, chunki Rossiya urushni kuchaytirishni tanlamoqda. Moskva fuqarolik infratuzilmasiga hujum qilib, urush jinoyatlarini sodir etishga qaror qildi. RF bu urushda g‘alaba qozona olmaydi. Uning hujumi shu bilan yakunlanishi kerak”, — dedi u.
Makronning fikricha, sivilizatsiyalashgan dunyoda kuch ishlatish odatiy holga aylanib qolmasligi uchun harakat qilishi kerak, aks holda global barqarorlik so‘roq ostida qoladi. Shu munosabat bilan Ukrainani qarshi hujum uchun resurslar bilan taʼminlash lozim.
“Biz Ukrainani qo‘llab-quvvatlash borasidagi saʼy-harakatlarimizni kuchaytirishimiz kerak, toki Ukrainaning o‘zi qarshi hujumga o‘tishi, g‘alaba qozonishi va muzokaralar jarayonini boshlashi mumkin”, — degan Fransiya prezidenti.
Uning ishontirishicha, Fransiya bir necha hafta va oylar ichida saʼy-harakatlarini kuchaytirishga tayyor.
