Sirdaryoda noqonuniy baliq ovlovchilar aniqlandi
Ular hayvonot dunyosiga 25 mln zarar yetkazgan.
Sirdaryo viloyatining Oqdaryo tumanida noqonuniy baliq ovlovchilar aniqlandi. Bu haqda Tabiat resurslari vazirligi Sirdaryo viloyati boshqarmasi xabar bermoqda.
Maʼlum qilinishicha, fuqarolar A.T. va A.A. Oqoltin tumani «A.Toirov» SIU hududidan oqib o‘tuvchi katta markaziy zovurdan elektr qarmoq yordamida 6 turdagi jami 26 dona (2 dona oq amur, 6 dona oq sla, 4 dona do‘ngpeshona, 10 dona oqqayroq, 1 dona tovonbaliq va 3 dona boshqa turdagi) baliqlarni noqonuniy ravishda ovlagan.
Tungi reyd tadbirida huquqbuzarlardan bir dona rezina qayiq, bir dona akkumulyator, elektr qarmoq va ovlangan baliqlar ashyoviy dalil sifatida olib qo‘yilgan.
Mazkur holat yuzasidan fuqarolar A.T. hamda A.A.ga nisbatan maʼmuriy bayonnomalar rasmiylashtirilib, “Hayvonot dunyosini muhofaza qilish va undan foydalanish to‘g‘risida”gi qonunning 35- va 53-moddalari talabi buzilishi oqibatida hayvonot dunyosiga 25 740 000 so‘m zarar yetkazilganligi hisoblangan.
“Mazkur holat yuzasidan to‘plangan hujjatlar huquqiy baho berish maqsadida sud organlariga taqdim etish uchun tayyorlanmoqda”, — deyiladi xabarda.
