Hokimlarning vakolati qisqartirilmoqda
Bu bo‘yicha qonunchilikka yangi norma kiritiladi.
Qonunchilikka “Hokim bir vaqtning o‘zida xalq deputatlari Kengashining raisi lavozimini egallashi mumkin emas” degan norma kiritilmoqda. Bu haqda Oliy Majlis Qonunchilik palatasining qo‘shma yig‘ilishida maʼlum qilindi.
Qayd etilishicha, avvalgi muhokamalarda Konstitutsiyaviy qonun loyihasidan hokimlarning xalq deputatlari Kengashlariga boshchilik qilishini nazarda tutuvchi qoida chiqarib tashlangan edi.
Biroq jamoatchilik tomonidan berilgan takliflarda bunday o‘zgarishning o‘zi yetarli emasligi, yaʼni hokimlar xalq deputatlari Kengashlarida rahbar bo‘la olmasligi aniq ko‘rsatilishi kerakligi bildirilgan.
Shunga muvofiq, endilikda “hokim lavozimini egallab turgan shaxs bir vaqtning o‘zida tegishli xalq deputatlari Kengashining raisi lavozimini egallashi mumkin emas” degan qatʼiy norma o‘rnatilmoqda.
