Endi maktab o‘quvchilari darslarga borishi shart emasmi?
Vazirlik ijtimoiy tarmoqda tarqalgan xabarlarga izoh berdi.
Ijtimoiy tarmoqlarda maktab o‘quvchilari endi oldindan bitiruv imtihonlarini topshirishlari va maktab darslariga bormasliklari mumkin, degan mazmunda xabarlar tarqalmoqda.
Maktabgacha va maktab taʼlimi vazirligi ushbu xabarlar hech qanday asosga ega emasligini va yolg‘on maʼlumot ekanligini bildirdi.
Qayd etilishicha, bu xabarlar maktabni o‘z vaqtida tugata olmagan, yaʼni maktab yoshidan o‘tgan fuqarolarning eksternat tartibida imtihon topshirish uchun arizalar berish bilan bog‘liq xabarning noto‘g‘ri talqin qilinganligi natijasida tarqatilmoqda.
“Taʼlim to‘g‘risida”gi qonunga muvofiq, fuqarolarning umumiy o‘rta taʼlim olish huquqini taʼminlash maqsadida eksternat tartibida imtihonlarda faqat o‘z vaqtida turli sabablarga ko‘ra umumiy o‘rta taʼlimni yakunlay olmagan, aniqroq aytganda, maktabni to‘liq bitirmagan 18 yoshdan oshgan fuqarolar ishtirok etadi.
“Eksternat tartibidagi imtihonlarning maktabda taʼlim olayotgan o‘quvchilarga aloqasi yo‘q va ularga tatbiq etilmaydi”, — deyiladi xabarda.
