To‘rtko‘ldagi suv toshqini bo‘yicha qator mansabdorlarga jinoyat ishi qo‘zg‘atildi
Jinoyat ishi doirasida fuqarolarga yetkazilgan zararni aniqlash yuzasidan ekspertiza ham tayinlangan.
Qoraqalpog‘iston Respublikasi bosh prokuraturasi rasmiy maʼlumot berishicha, joriy yilning 24 fevral kuni tungi soat 03:00 larda To‘rtko‘l tumani, “Kaltaminor” OFY hududidan o‘tuvchi “Kaltaminor-1” kanalining o‘ng qirg‘og‘ida suvning ko‘tarilishi hisobiga kengligi 5 m, chuqurligi 1.78 m bo‘lgan suv toshib chiqish hodisasi sodir bo‘lgan.
Toshqin natijasida shu hududda yashovchi 7 nafar fuqaroning yashash uyi va yordamchi xo‘jalik inshootlariga zarar yetkazilgan.
Suv toshqini jarayonida jarohatlangan fuqarolar bo‘lmagan.
Favqulodda vaziyatlar vazirligi tomonidan shu kuni soat 07 ga qadar suv toshqini bartaraf etilib, to‘planib qolgan suvdan hovli yer maydonlari tozalangan.
Shu kunning o‘zida hodisa joyiga Qoraqalpog‘iston Respublikasi Jo‘qorg‘i Kengashi, Vazirlar Kengashi hamda respublika prokuraturasi masʼullari yetib borib, vaziyat joyida o‘rganilib, suv toshqini oqibatlarini bartaraf etish bo‘yicha hududiy sektor rahbarlari hamda boshqa masʼullarga tegishli topshiriqlar berilgan.
Mazkur holat yuzasidan shu kunning o‘zida To‘rtko‘l tuman prokuraturasi tomonidan “Paxta Arna Nayman” irrigatsiya tarmoqlari boshqarmasi va To‘rtko‘l tuman Irrigatsiya bo‘limi mansabdor shaxslari hamda boshqalarga nisbatan JKning 203, 207 va 229-moddalari bilan jinoyat ishi qo‘zg‘atilgan.
"Jinoyat ishi doirasida fuqarolarga yetkazilgan zararni aniqlash yuzasidan ekspertiza tayinlangan.
Hozirda hodisa yuz berishiga sababchi bo‘lgan aybdorlarni aniqlashga qaratilgan tergov harakatlari olib borilmoqda, natijasiga ko‘ra qonuniy qaror qabul qilinishi taʼminlanadi", — deyiladi xabarda.
