Bekatlarda kutish vaqti uzaydi: Toshkentda avtobuslar nega kechikmoqda?
Transport boshqarmasi avtobuslarning harakat intervali nega buzilayotganiga izoh berdi.
Toshkent shahrida avtobuslarni kutish vaqti uzaygani hamda jamoat transporti harakati belgilangan intervallarga muvofiq emasligi yuzasidan yo‘lovchilar tomonidan e’tirozlar bildirilmoqda. Toshkent shahar transport va yo‘l-transport infratuzilmasini rivojlantirish bosh boshqarmasi mazkur holatga izoh berdi.
Boshqarma ma’lumotiga ko‘ra, ayni vaqtda poytaxtning Shahrisabz, Amir Temur shoh ko‘chasi hamda Yangi Sergeli ko‘chalarida jamoat transporti uchun alohida ajratilgan yo‘laklar (BRT)ni tashkil etish va kapital ta’mirlash ishlari olib borilmoqda.
Ushbu ishlar doirasida umumiy uzunligi 5,09 kilometr bo‘lgan yo‘l qismlarida qurilish-montaj ishlari amalga oshirilmoqda. Jumladan:
-
Shahrisabz ko‘chasining 1 kilometrlik qismida;
-
Amir Temur shoh ko‘chasining 2,73 kilometrlik qismida. Shundan 1,43 kilometri birinchi, 1,3 kilometri esa ikkinchi bosqichni tashkil etadi;
-
Yangi Sergeli ko‘chasining 1,36 kilometrlik qismida.
Boshqarma tushuntirishicha, qurilish-montaj ishlari sabab ayrim yo‘l uchastkalarida transport vositalari harakatiga vaqtinchalik cheklovlar kiritilgan. Bu esa poytaxtning qator ko‘chalarida tirbandliklar ortishiga olib kelmoqda.
Ayniqsa, ertalabki va kechki tig‘iz vaqtlarda transport oqimining ko‘payishi avtobuslarning belgilangan harakat jadvali va intervallariga rioya etishida kechikishlarni yuzaga keltirmoqda. Natijada ayrim yo‘nalishlarda avtobuslar orasidagi harakat oralig‘i uzayib, yo‘lovchilarning bekatlarda kutish vaqti ortmoqda.
Boshqarma qayd etishicha, qurilish-montaj ishlari yakunlanib, yo‘llarda transport vositalarining odatiy harakati tiklangach, mavjud tirbandliklar kamayadi. Shundan so‘ng avtobuslar harakati ham belgilangan jadval asosida barqarorlashadi.
