O‘qituvchilardan “komissiya uchun” pul yiqqan direktor ishdan olindi
Hozirda holat bo‘yicha tekshiruv o‘tkazilmoqda.
Ijtimoiy tarmoqlarda Qoraqalpog‘iston Respublikasining Xo‘jayli tumanidagi 21-sonli umumtaʼlim maktabi direktori P.A. o‘zi Toshkent shahrida bo‘la turib, “komissiya uchun” degan vaj bilan o‘qituvchi va texnik xodimlardan 20 ming so‘mdan pul yig‘dirgani haqida xabar tarqaldi. Tuman prokuraturasi holat yuzasidan maʼlumot berdi.
Aniqlanishicha, joriy yilning 10 fevral kuni maktab direktori P.A.ning topshirig‘iga asosan, maktab o‘qituvchisi D.R. tomonidan 16 nafar o‘qituvchidan 320 ming so‘m yig‘ib olingan va direktorga berilgan. Direktorning o‘zi esa 18 nafar o‘qituvchidan 360 ming so‘m yig‘ib olib, jami 680 ming so‘m pul yig‘ilgan.
Maktab direktori p.A. o‘z ko‘rsatmasida ushbu pullar maktabdagi bannerlarni yangisiga almashtirish uchun yig‘ilganini, yig‘ilgan pullar amalda hech qayerga ishlatilmasdan, o‘qituvchilarga yana qaytarib berilganini bayon qilib o‘tgan.
Bir guruh o‘qituvchilar pullarni yig‘ilish sabablari haqida p.A. bergan ko‘rsatmalarni tasdiqlashgan, bir guruhi esa yig‘ilgan pullar kelgan komissiyani tushlikda ovqatlantirish bahonasida yig‘ilganligini bayon qilishgan. 2023 yil 24 fevral kuni P.A. o‘z ixtiyori bilan ishdan bo‘shash haqida ariza yozgan va shunga asosan lavozimidan ozod qilingan. Hozirda tergovga qadar tekshiruv davom etmoqda.
