Yangiyerda erkak xotini va o‘zini pichoqlab o‘ldirdi
Voqea ayol tahsil oladigan kollejda yuz bergan.
Sirdaryo viloyatining Yangiyer shahrida er xotinini qasddan o‘ldirib, so‘ng o‘ziga pichoq urdi. Bu haqda Bosh prokuratura matbuot xizmatiga tayanib, “Daryo” nashri yozmoqda.
Maʼlum qilinishicha, voqea 2 mart kuni soat 08:20 larda Yangiyer shahar tibbiyot kolleji hovlisida yuz bergan. Fuqaro R.U. shu kollejning ikkinchi bosqich talabasi bo‘lgan turmush o‘rtog‘i D.U.ni oilaviy kelishmovchilik negizida qasddan o‘ldirish maqsadida o‘zi bilan olib kelgan oshxona pichog‘i bilan uning o‘ng bo‘yin, o‘ng va chap ko‘krak, chap oyoq boldir sohalariga jami yetti marotaba urib, qasddan o‘ldirgan.
Shundan so‘ng R.U. sodir qilgan jinoyati uchun javobgarlikdan qochish maqsadida qo‘lidagi pichoq bilan o‘zining bo‘yin va ko‘krak sohalariga ikki marotaba urib, o‘ziga-o‘zi og‘ir tan jarohatlari yetkazgan.
U olgan tan jarohatlari bilan Yangiyer shahar tibbiyot birlashmasining jonlantirish bo‘limiga yotqizilgan, biroq ko‘rsatilgan tibbiy yordamlarga qaramasdan kasalxonada vafot etgan.
Mazkur holat yuzasidan Yangiyer shahar prokuraturasi tomonidan R.U.ga nisbatan Jinoyat kodeksining 97-moddasi (qasddan odam o‘ldirish) 1-qismi bilan jinoyat ishi qo‘zg‘atilib dastlabki tergov harakatlariga kirishilgan.
Maʼlumot uchun, marhuma ayol 40 yoshda, uning eri 45 yoshda bo‘lgan. Ularning uch nafar farzandi bor.
