Iqtidorli yoshlarning oliy taʼlim olishi kafolatlanadi

 

Yoshlarning oliygohlarda davlat hisobidan grant asosida o‘qish huquqi Konstitutsiyada belgilanmoqda. Yaʼni, bu bilan iqtidorli yoshlarning davlat hisobidan oliy taʼlim olish imkoniyati kafolatlanmoqda.

 

Shu bilan birga, nogironligi bor bolalarga o‘z tengdoshlari bilan bir xil taʼlim olishi uchun barcha sharoitlar yaratish, yaʼni inklyuziv taʼlim tizimini rivojlantirish bo‘yicha davlat o‘ziga majburiyat olmoqda.

 

Konstitutsiyaviy qonun loyihasida pedagog xodimlarga oid qoidalar qayta ko‘rib chiqildi va o‘qituvchi kasbiga nisbatan yuksak hurmatni hamda ularning ijtimoiy himoyasini nazarda tutuvchi alohida yangi modda kiritildi.

 

Bundan tashqari, davlat o‘qituvchilarning shaʼni va qadr-qimmatini himoya qilishi, ularning ijtimoiy va moddiy farovonligi, kasbiy o‘sishi haqida g‘amxo‘rlik qilishi mustahkamlanmoqda.

 

"Konstitutsiya loyihasida 18 milliondan ortiq yoshlarimiz masalalariga ham eʼtibor berilib, ularning taʼlim olishi, ijtimoiy va tibbiy himoyasi, uy-joyli bo‘lishi, bandligi uchun shart-sharoitlar yaratish – davlatning konstitutsiyaviy majburiyati ekanligi belgilanmoqda. Bosh qomusimizda yoshlar uchun alohida bob ajratilmoqda.

Ota-onalarning o‘z farzandlarini voyaga yetguniga qadar nafaqat boqish va tarbiyalash, balki ularning taʼlim olishi, sog‘lom, to‘laqonli va har tomonlama kamol topishi uchun ham g‘amxo‘rlik qilishi belgilanmoqda.

Shuningdek, yoshlarni himoya qilish, ularning huquqlarini amalga oshirish uchun shart-sharoitlar yaratish davlatning majburiyati sifatida belgilanmoqda. Bu esa yosh avlod hayotini yaxshilash, ular orzu-intilishlarini ro‘yobga chiqarish va hayotda o‘z o‘rinlarini topishlari uchun ulkan imkoniyat yaratadi", deydi J. Shirinov.