Maktablarda bahorgi taʼtil qachon boshlanishi maʼlum bo‘ldi
Bu bo‘yicha vazirlik maʼlumot berdi.
Maktablarda bahorgi taʼtil 20 mart sanasidan boshlanadi. Bu haqda Maktabgacha va maktab taʼlimi vazirligi xabar berdi.
Qayd etilishicha, Vazirlar Mahkamasi qarori bilan tasdiqlangan Nizomga muvofiq, umumiy o‘rta taʼlim maktablarida bahorgi taʼtil 21 mart sanasidan boshlanib, 7 kalendar kun davom etishi belgilangan.
“2023 yilda rasmiy sanalarni nishonlash davrida qo‘shimcha ishlanmaydigan kunlarni belgilash va dam olish kunlarini ko‘chirish to‘g‘risida”gi Prezident Farmoniga ko‘ra, 2023 yil 20 mart kuni – qo‘shimcha dam olish kun sifatida belgilanganligi munosabati bilan maktablarda bahorgi taʼtil 20 mart sanasidan boshlanadi hamda 26 martga qadar (shu kuni ham) davom etadi.
“Shularni inobatga olib, umumiy o‘rta taʼlim maktablarida 18 mart (shanba) III chorakning so‘nggi o‘qish kuni bo‘lib, IV chorak 27 mart sanasidan boshlanishini maʼlum qilamiz”, — deyiladi xabarda.
