Bosh vazirga matbuot kotib tayinlandi
Bekzod Shukurov tayinlovga qadar Vazirlar Mahkamasi Turizm, madaniyat va ommaviy kommunikatsiyalar masalalari kotibiyatining Ommaviy kommunikatsiyalar va axborot ochiqligini taʼminlash masalalari shuʼbasi mudiri vazifasida ishlab kelayotgan edi.
Bekzod Abduqayumovich Shukurov O‘zbekiston Respublikasi Bosh vazirining matbuot kotibi etib tayinlandi.
Bekzod Shukurov O‘zbekiston Milliy universitetining jurnalistika fakulʼteti tamomlagan. 2002-2014 yillarda “O‘zbekiston ovozi” gazetasida muxbir, bo‘lim mudiri, bosh muharrir o‘rinbosari bo‘lib ishlagan. 2014-2018 yillarda “Jamiyat” gazetasining bosh muharriri bo‘lgan, 2018 yildan buyon Vazirlar Mahkamasida ommaviy axborot vositalarini rivojlantirish masalalari bo‘yicha bosh mutaxassis vazifasida ishlagan.
“O‘zbekiston ovozi” gazetasida ijtimoiy-siyosiy mavzulardagi, xususan saylovlar, parlament faoliyati, ayniqsa, siyosiy partiyalar o‘rtasidagi bahs-munozaralarga bag‘ishlangan maqolalari bilan jamoatchilikka tanilgan. “Jamiyat” gazetasi uning bosh muharrirligida tahliliy-tanqidiy maqolalari bilan ko‘pchilikning eʼtiboriga tushgan.
Bekzod Shukurov 2011 yilda “Oltin qalam” milliy mukofoti uchun xalqaro tanlov g‘olibi bo‘lgan. 2017 yilda “Eʼtirof” milliy tanlovida yilning eng yaxshi publitsisti deb topilgan.
