Qashqadaryoda to‘y kunida mashina oynasidan tanasini chiqarib, pul sochganlarga chora ko‘rildi
Holat bo‘yicha viloyat IIB maʼlumot berdi.
Ijtimoiy tarmoqda Qashqadaryodagi to‘yda kuyovning do‘stlari avtomashina harakatlanishi vaqtida oynadan tanasini chiqarib, soxta pullar sochgani aks etgan video tarqaldi. holat yuzasidan viloyat IIB maʼlumot berdi.
Qayd etilishicha, Chiroqchi tumanida yashovchi fuqaroning nikoh to‘yi munosabati bilan to‘plangan uning tanishlari ikkita Lacetti‘da harakatlanish davomida soxta pullarni sochib, tomosha ko‘rsatishgan. Bir nafar videotasvirchi esa tanasini mashina oynasidan chiqarib, holatni videoga olgan. Holat yuzasidan surishtiruv olib borilganda haydovchilar 23 yoshgacha bo‘lgan yigitlar ekani aniqlandi. Ularning ko‘pchiligi ota-onasining mashinalarini olib chiqishgani maʼlum bo‘ldi.
“Mashinaning oynasidan tanamni chiqarib videoga olganimni kuyovning do‘stlari suratga olib, internetda tarqatib yuborgan ekan. Qilgan ishimdan pushaymonman”, — deydi tasvirchi.
Shuningdek, haydovchi ham tasvirchining bu ishiga beparvolik qilganini tan olib, uzr so‘radi. Avtomobillarini o‘g‘illariga bergan otalar bu ishidan pushaymonligini bildirishdi. Avtomashina egalari va videotasvirchiga MJtKning 138-moddasi 4-qismi bilan jarima jazosi tayinlandi.
