Prezident Ulug‘bek Qosimov nomzodini Surxondaryo viloyati hokimi lavozimiga taklif etdi

 

Shavkat Mirziyoyev viloyat deputatlari va faollari bilan maslahatlashib, viloyat hokimi vazifasini bajarib kelayotgan Qosimov Ulug‘bek Berdiqobilovich nomzodini Surxondaryo viloyati hokimi lavozimiga taklif qildi.

 

Prezident viloyatda oxirgi besh yilda sanoat, qishloq xo‘jaligi va xizmat ko‘rsatish sohalarida 15 mingdan ziyod korxona ishga tushganini aytdi.

 

“Bugun yig‘ilishdan keyin ishga tushiriladigan 6 ta korxonada ham qo‘shimcha 2 mingta yangi ish o‘rni yaratildi, viloyat ishlab chiqarishiga 370 milliard so‘m, eksportiga 20 million dollar qo‘shiladi. 2022 yilda ishga tushgan “Zarchob-1” va “Zarchob-2” mikro GESlarida yiliga 201 million kilovatt soat elektr ishlab chiqarilmoqda. Bugun ishga tushadigan “To‘palang GES”da yiliga yana 467 million kilovatt soat elektr ishlab chiqarish qo‘shiladi”, — dedi davlat rahbari.

 

Prezident 257 ta maktab qurildi va rekonstruksiya qilingani, bog‘cha qamrovi 18 foizdan 62 foizga yetkazilganini alohida taʼkidladi.

 

Shuningdek, viloyatda:

 

• 302 ming aholi ilk bor markazlashgan ichimlik suvi bilan taʼminlandi;

• 1 ming kilometr xalqaro va 3 ming kilometr ichki yo‘llar taʼmirlandi.

 

“Eng asosiysi, odamlarimiz va tadbirkorlarda kelajakka ishonch paydo bo‘ldi. Endi, ko‘nglimdagi bitta gapni aytsam. Agar yana bir-ikki yil birgalikda qattiq ishlasak, Surxondaryoda juda katta rivojlanish, o‘sish bo‘ladi. Shu bois, 13 ta tuman hokimi lavozimiga respublika idoralarida ishlagan, malakali kadrlarni qo‘ydik.

Bugungi sessiyada Surxondaryo viloyatiga hokim tayinlash bo‘yicha tashkiliy masalani ko‘rib chiqishimiz kerak. Viloyat deputatlari va faollari bilan maslahatlashib, viloyat hokimi vazifasini bajarib kelayotgan Qosimov Ulug‘bek Berdiqobilovich nomzodini bu lavozimga taklif qilaman. Ulug‘bek Qosimovga berilgan qisqa vaqt va imkoniyat Surxondaryodagi vaziyat va aholi tashvishlarini chuqur o‘rganish uchun yetarli, deb hisoblayman”, — dedi Shavkat Mirziyoyev.