Bugun Senatning o‘ttiz sakkizinchi yalpi majlisi bo‘lib o‘tadi
Unda senatorlar Konstitutsiyaviy qonun loyihasini ko‘rib chiqadi.
Bugun Oliy Majlis Senatining o‘ttiz sakkizinchi yalpi majlisi bo‘lib o‘tadi. Unda “O‘zbekiston Respublikasi Konstitutsiyasi to‘g‘risida”gi O‘zbekiston Respublikasi Konstitutsiyaviy Qonuni loyihasi muhokama qilinadi. Bu haqda Oliy Majlis Senati Axborot xizmati maʼlum qildi.
Yalpi majlisda senatorlar, Hukumat aʼzolari, davlat organlari, vazirlik va idoralar rahbarlari, mamlakatimizda akkreditatsiyadan o‘tgan diplomatik korpus hamda xalqaro tashkilotlar vakillari, Senat huzuridagi Yoshlar parlamenti aʼzolari, shuningdek, ommaviy axborot vositalari vakillari ishtirok etadi.
Maʼlumot o‘rnida: O‘zbekiston Konstitutsiyasining 78-moddasiga asosan O‘zbekiston Respublikasining referendumini o‘tkazish to‘g‘risida va uni o‘tkazish sanasini tayinlash haqida qaror qabul qilish Oliy Majlis Qonunchilik palatasi va Senatining birgalikdagi vakolatlari hisoblanadi.
Eslatib o‘tamiz, kecha Qonunchilik palatasi qarorining (ilovalari bilan) O‘zbekiston Respublikasi Konstitutsiyasiga muvofiqligini aniqlash bo‘yicha Konstitutsiyaviy sudning majlisi bo‘lib o‘tdi. Unda Konstitutsiyaviy qonun loyihasini referendumga qo‘yishga moneʼlik qiluvchi holatlar aniqlanmadi. Konstitutsiyaviy sud tomonidan hujjatni O‘zbekiston Respublikasining Konstitutsiyasiga muvofiq deb topish haqida qaror qabul qilindi.
