Ko'krak nishonlari soni yana bittaga ko'paydi

 

Shavkat Mirziyoyev “El-yurt fidoyisi” koʻkrak nishoni taʼsis etish taklifini bildirdi. Davlat rahbari Termiz shahridagi “Yosh chegarachilar” harbiy-akademik litseyini borib koʻrdi. 

 

Oʻtgan yili litsey uchun yangi bino barpo etilgan. Bu yerda ijtimoiy va aniq fanlar yoʻnalishlarida 200 dan ortiq oʻquvchi taʼlim-tarbiya olmoqda.

 

Davlat rahbari shu yerda Vatan himoyasi va el-yurt tinchligi yoʻlida halok boʻlgan harbiy xizmatchilar va xodimlarning oila aʼzolari bilan uchrashdi. Videoaloqa orqali tadbirga Qoraqalpogʻiston Respublikasi va viloyatlar vakillari ham bogʻlandi.

 

Maʼlumki, mustaqillikka erishish, tinchlikni saqlash oʻz-oʻzidan boʻlmaydi. Xalqimiz ham koʻp sinovli kunlarni boshidan kechirdi. Osoyishta hayotimizni izdan chiqarishga urinishlar, terrorchilik xurujlari boʻldi. Botir harbiylarimiz jasorat koʻrsatib, gʻarazli kuchlarga qaqshatqich zarba bergan. Ming afsuski, bu kurashda yuzlab mard harbiylarimiz, huquqni muhofaza qiluvchi idoralar xodimlari halok bo'lgan.

 

Uchrashuvda davlatimiz rahbari ularni nomma-nom yodga oldi. Bunday dovyurak farzandlarni dunyoga keltirib, haqiqiy vatanparvar qilib tarbiyalagan ota-onalarga, ularning umr yoʻldoshlari va farzandlariga xalqimiz nomidan chuqur minnatdorchilik bildirdi.

 

Davlat rahbari bunday mard insonlarni voyaga yetkazgan ota-onalari, farzandlari doimo yurtimiz ardogʻida boʻlishi zarurligini taʼkidlab, “El-yurt fidoyisi” koʻkrak nishoni taʼsis etish taklifini bildirdi. Bu nishon guvohnomasi Oliy Bosh qoʻmondon tomonidan imzolanadi. Ushbu eʼtirof egalari barcha imtiyozlarga ega boʻladi.

 

Bugun dunyoning turli nuqtalarida yangi tahdid va qurolli toʻqnashuvlar yuz bermoqda. Bunday tahlikali vaziyat xalqimizni ham bezovta qilishi tabiiydir. Shu bois davlatimiz mustaqilligini, xalqimiz tinchligini himoyalashga katta ahamiyat qaratilmoqda.