O‘zbekistondagi Ozarbayjon Madaniyat markazida Navro‘z bayrami nishonlandi
Tadbirda Ozarbayjonning O‘zbekistondagi elchixonasi, Ozarbayjon Madaniyat Markazi xodimlari, O‘zbekiston madaniyat, adabiyot va sanʼat namoyandalari, mahalliy ozarbayjonliklar, Toshkentdagi oliy o‘quv yurti o‘qituvchi va talabalari, jurnalistlar ishtirok etdi.
O‘zbekistondagi Haydar Aliyev nomidagi Ozarbayjon Madaniyat Markazida Navro‘z bayrami munosabati bilan bayram tadbiri bo‘lib o‘tdi.
Tadbirda Ozarbayjonning O‘zbekistondagi elchixonasi, Ozarbayjon Madaniyat Markazi xodimlari, O‘zbekiston madaniyat, adabiyot va sanʼat namoyandalari, mahalliy ozarbayjonliklar, Toshkentdagi oliy o‘quv yurti o‘qituvchi va talabalari, jurnalistlar ishtirok etdi.
Ozarbayjon Madaniyat markazi foyesida tashkil etilgan “Bahor nafasli Navro‘z” nomli ko‘rgazmada Navro‘z bayrami, Ozarbayjonning maftunkor tabiati aks etgan fotosuratlar, shuningdek, Haydar Aliyevning hayoti va ijodi, Ozarbayjon Prezidenti Ilhom Aliyevning iqtisodiy islohotlari va milliy madaniyatimizga oid suvenirlar namoyish etildi. Ishtirokchilar Navro‘zga oid bayram taomlar, shirinliklar, shakarbura, paxlava bilan mehmon qilindi.
Avvalo, tadbir ishtirokchilarini Navro‘z bayrami Ozarbayjon Respublikasining O‘zbekiston Respublikasidagi elchisi Husayn Guliyev muborakbod etib, milliy bayramimiz hisoblangan Navro‘z Ozarbayjonda, O‘zbekistonda, shuningdek, turkiy dunyo mamlakatlarida nishonlanishi, umumiy bayram til, din, anʼana, madaniyat, urf-odatlar kabi xalqlarimizni birlashtirishini, mamlakatlarimiz o‘rtasidagi diplomatik aloqalarning kengayib borayotgani qardosh xalqlar o‘rtasidagi munosabatlarga ham ijobiy taʼsir ko‘rsatayotganini qayd etdi.
O‘zbekiston-Ozarbayjon Do‘stlik Jamiyati Ijrochi direktori, professor Erkin Nuriddinov qardosh xalqlarning azaliy qadriyati bo‘lgan Navro‘z ayyomi bilan qutlar ekan, ushbu milliy bayramning birgalikda nishonlanishi tarixiy madaniy ildizlarimiz naqadar yaqin ekanining yana bir yorqin ifodasi ekaniga urg‘u qaratdi.
Bayram tabriklaridan so‘ng, Ozarbayjonda Navro‘z bayramini nishonlash aks ettirilgan film namoyish etildi.
Tadbirning badiiy qismida Ozarbayjon Madaniyat markazi tasarrufidagi “Xizmat ko‘rsatgan artist Kaykep Aliyeva nomidagi Ozarbayjon qizlari” raqs ansambli ishtirokchilari tomonidan milliy hamda bahoriy raqslar taqdim etildi. Shuningdek, ozarbayjonlik ijrochilar Vohid Aliyev va Fotima Iskandarova, xalqaro mukofotlar sovrindori Sarvinoz Kamalova tomonidan ozarbayjon va o‘zbek qo‘shiqlari ijro etildi.
