Germaniya xatoga yo‘l qo‘ydi–Mateush Moraveski
Polsha bosh vaziri Germaniya Ukrainani yetarli darajada qo‘llab-quvvatlay olmayotganini aytdi.
Polsha bosh vaziri Mateush Moraveski Yevropa Ittifoqi yetakchilarining Bryusseldagi sammitidan so‘ng Germaniya Ukrainani yetarli darajada qo‘llab-quvvatlay olmayotganini aytdi.
“Ular kerak bo‘lgan darajada saxiy emas”, – deya qo‘shimcha qilgan u.
Janob Moraveski Berlin o‘z siyosatida o‘zgarishlar qilgani, jumladan, qurolli kuchlarini modernizatsiya qilishga katta sarmoya kiritgani va urush hududiga qurol jo‘natish taqiqini bekor qilganini tan oldi. Shuningdek, u Germaniyaning Ukrainaga «Leopard» jangovar tanklarini yuborish qarorini ham qayd etdi.
Polsha bosh vaziri Germaniyaning o‘tmishdagi energetika siyosati haqida ham gapirdi.
“Germaniya qazib olinadigan yoqilg‘i bo‘yicha biznes modeli uchun butunlay Rossiyaga bog‘liq bo‘lib, dramatik xatoga yo‘l qo‘ydi”, – dedi Moraveski.
Bundan tashqari, Mateush bir nechta takliflarni bildirdi. Uning fikricha, NATO davlatlari o‘z xarajatlarini yalpi ichki mahsulotning 3 foizigacha keskin oshirishi, Yevropa Ittifoqi mudofaa maqsadlari uchun yangi qarzlarni jalb qilish imkoniyatlarini o‘rganishi, shuningdek, muzlatilgan Rossiya aktivlarini tezda harbiy amaliyotlarga yo‘naltirishi kerak.
