Buxoroda shifokorlar majburan ishdan bo‘shatilyotgani aytildi
Viloyat SSB holatga izoh berdi.
Ijtimoiy tarmoqlarda Buxoro viloyati stomatologiya poliklinikasi shifokorlarining majburan ishdan bo‘shatilayotgani aks etgan video tarqaldi. Holatga viloyat sog‘liqni saqlash boshqarmasi rasmiy munosabat bildirdi.
Maʼlum qilinishicha, mazkur poliklinika 1984 yilda qurilgan bo‘lib, 3 qavat va podval qismidan iborat. Muassasada bosqichma-bosqich taʼmirlash ishlari olib borilishi munosabati bilan poliklinikada faoliyat ko‘rsatayotgan tibbiyot xodimlarini boshqa qavatlarda faoliyat ko‘rsatishini taʼminlash uchun tashkiliy masalalar ko‘rib chiqilmoqda.
Ushbu masala bo‘yicha viloyat hokimining o‘rinbosari va sog‘liqni saqlash boshqarmasi rahbariyati tomonidan muassasa xodimlari orasida tushuntirish ishlari o‘tkazilgan.
“Xodimlarni bosim ostida ishdan haydalayotganligi to‘g‘risidagi maʼlumotlar asossizligini maʼlum qilamiz. Ayni paytda barcha tibbiyot xodimlari o‘z xizmat vazifalarini to‘laqonli bajarmoqda”, — deyiladi xabarda.
