Yevroittifoq shu oy oxirigacha Rossiyaga qarshi yangi sanksiyalarni eʼlon qiladi
11-paket rossiyalik biznesmenlarga ham taʼsir qilishi mumkin.
Yevropa Ittifoqi aprel oyi oxirigacha Rossiyaga qarshi 11-sanksiya paketini qabul qilishi mumkin. Qayd etilishicha, cheklovlar Turkiya, Qozog‘iston va arab davlatlariga allaqachon kiritilgan sanksiyalarni aylanib o‘tishning oldini olish mexanizmini nazarda tutadi.
Maʼlumotlarga qaraganda, 11-sanksiya paketi bu safar rossiyalik biznesmenlarga ham taʼsir qilishi mumkin. Shuningdek, yangi paketda Rossiyaga sanksiyalarni chetlab o‘tishga yordam berayotganlarga qarshi "ikkilamchi sanksiyalar" bo‘lishi reja qilingan. Bundan tashqari, Yevroparlament Rossiya yadro sektoriga, jumladan, «Rosatom» davlat korporatsiyasiga qarshi sanksiyalar qo‘llash imkoniyatini alohida ko‘rib chiqmoqda. Unga ko‘ra, sanksiyalar direktorlar kengashi aʼzolariga, shuningdek, yangi shartnomalarga taalluqli bo‘lishi mumkin.
