Sirdaryoda soxta departament xodimi ushlandi
Hozirda unga nisbatan jinoyat ishi ochilgan.
Sirdaryo viloyatida soxta departament xodimi ushlandi, deya xabar bermoqda Bosh prokuratura huzuridagi Iqtisodiy jinoyatlarga qarshi kurashish departamenti.
Qayd etilishicha, departamentning shaxsiy xavfsizlik bo‘limi hamda Sirdaryo viloyat boshqarmasi xodimlari tomonidan tezkor tadbir o‘tkazilgan. Unda hech qayerda ishlamaydigan M.A. fuqaro T.M.ning ishonchiga kirib, unga o‘zini go‘yo departamentning Yangiyer shahar bo‘limi xodimi sifatida tanishtirib, 1 000 AQSH dollari evaziga uni ushbu bo‘limga ishga joylashtirib qo‘yishini aytib, shundan 600 AQSH dollarini 2023 yil 15 aprel kuni olib, qolgan 400 AQSH dollarini olgan vaqtida ashyoviy dalillar bilan qo‘lga tushgan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
