Sudanda 72 soat o‘t ochishni to‘xtatishga kelishib olindi
Bu haqda Entoni Blinken maʼlum qildi.
AQSH Davlat departamenti rahbari Entoni Blinken Sudan armiyasi va Tezkor harakat kuchlari 72 soat davomida o‘t ochishni to‘xtatishga kelishib olganini maʼlum qildi.
“Ikki kun davom etgan qizg‘in muzokaralardan so‘ng Sudan Qurolli Kuchlari va Tezkor harakat kuchlari butun mamlakat bo‘ylab o‘t ochishni to‘xtatishga kelishib oldi. U 24 aprel kuni yarim tunda boshlanadi va 72 soat davom etadi”, — dedi Blinken.
Sudanda o‘t ochishni to‘xtatish bo‘yicha avval ham bir necha bor urinishlar bo‘lgan, biroq ularning barchasi muvaffaqiyatsiz tugagan.
Hukumat qo‘shinlari va Tezkor harakat kuchlari o‘rtasidagi mojaro 15 aprel kuni Sudan armiyasi Xartum janubidagi RRF bo‘linmalariga hujum qilganidan keyin boshlangandi.
