Denovlik erkak ukasining xotinini urib, jag‘ini sindirib tashladi
Holat bo‘yicha viloyat IIB maʼlumot berdi.
Ijtimoiy tarmoqlarda Surxondaryo viloyatining Denov tumanida kelinning qaynakasi uni urib, jag‘ini sindirib tashlagani haqida videolavha tarqaldi. Holat yuzasidan viloyat IIB axborot xizmati maʼlumot berdi.
Hodisa 21 aprel kuni soat 17:30 larda Denov tumani «Elobod» mahallasida yuz bergan. Mazkur mahallada yashovchi Q.Y. qarindoshi J.M. ismli ayol bilan avvaldan davom etib kelayotgan oilaviy nizolari sababli uning yashash uyida o‘zaro janjallashib qolgan va ayol tanasining turli joylariga qo‘llari bilan urib, tan jarohati yetkazgan.
Dastlabki maʼlumotlarga ko‘ra, bemorga o‘rtacha og‘ir tan jarohatlari tashxisi qo‘yilgan.
Holat yuzasidan Denov tumani IIB huzuridagi Tergov bo‘limi tomonidan Jinoyat kodeksining 105- moddasi 2-qismi «g» bandi bilan jinoyat ishi qo‘zg‘atilib, tergov harakatlari olib borilmoqda. Gumonlanuvchi shaxs Jinoyat protsessual kodeksining 221-moddasi tartibida ushlangan.
“Tergov harakatlari Surxondaryo viloyati Ichki ishlar boshqarmasi tomonidan nazoratga olinganligini maʼlum qilamiz”, – deyiladi xabarda.
