Buxorodagi ustaxonada gaz balloni yorilib ketdi
Oqibatda 2 kishi 95 foiz kuyish bilan shifoxonaga yotqizilgan.
Bugun, 28 aprel kuni Buxoro shahridagi ustaxonalarning birida maishiy gaz balloni yorilib ketdi. Bu haqda viloyat Favqulodda vaziyatlar boshqarmasi xabar bermoqda.
Holat Buxoro shahar «S.Rahimov» MFY hududidagi yo‘l yoqasida joylashgan MJCHga qarashli avtomobillarga gaz ballonlarini o‘rnatish va texnik xizmat ko‘rsatish ustaxonasida yuz bergan. Ustaxonada hajmi 50 litrli suyultirilgan maishiy gaz balloni yorilgan.
Voqea joyiga 2 ta yong‘in-qutqaruv avtoekipajlari jalb qilingan. Shifokorlarning dastlabki tashxisiga ko‘ra, fuqarolar — 1985-yilda tug‘ilgan S.Sh. va 1986-yilda tug‘ilgan K.Sh. 90-95 foiz kuyish tan jarohatini olgan. Ular RSHTYIM Buxoro filiali kuyish bo‘limiga yotqizilgan va hozirda ahvoli og‘ir.
Maʼlum bo‘lishicha, gaz ballonini taʼmirlash jarayonida u yorilib ketgan va ustaxonaning eshik hamda derazalari sinib shikastlangan.
