To‘rtko‘lda Malibu haydovchisi nogiron fuqaroni kaltakladi

 

Ijtimoiy tarmoqlarda Qoraqalpog‘iston Respublikasining To‘rtko‘l tumanida 15 bola bir bolani ayovsiz kaltaklagani aytilgan video tarqaldi. Respublika prokuraturasi holat yuzasidan munosabat bildirdi.

 

Qayd etilishicha, 24 aprel kuni soat 16:00 larda fuqaro I.I. boshqaruvidagi Malibu rusumli avtomashinasida 1-guruh nogironi D.b. boshqaruvidagi Spark rusumli avtotransport vositasini orqasidan quvib kelib, to‘xtatgan. U “nega meni yo‘lda qisib ketding” degan bahona bilan bolalikdan nogiron, ikki oyog‘i ishlamaydigan D.B.ni yuzlariga qo‘llari bilan urib, tan jarohati yetkazgan hamda voqea joyidan ketgan.

 

Fuqaro D.B. o‘zining kaltaklanganligi haqida akasi D.M. hamda ukasi D.A.larga xabar berganidan keyin aka-ukalar vaziyatga oydinlik kiritish maqsadida I.I.ni telefon orqali tumanning Yoshlik mahallasidagi “Samarqand” ko‘chasi bo‘yida joylashgan bog‘ oldida uchrashuvga chaqirishgan.

 

Shu kuni soat 18:00 larda uchrashuvga I.I. tanishi b.U. bilan birga borganida, aka-ukalar D.M. va D.A.lar “nogiron ukamni nega urasan” deb I.I. bilan o‘zaro tortishib, uni urib tan jarohati yetkazishgan.

 

Mazkur holat Respublika prokuraturasi tomonidan nazoratga olinib, Respublika prokurorining 29 aprel kungi qarori bilan Jinoyat kodeksining 277-moddasi 2-qismi “b” bandi bilan holat yuzasidan jinoyat ishi qo‘zg‘atilgan.

 

“Jinoyat ishi tergovi Qoraqalpog‘iston Respublikasi Ichki ishlar vazirligi Tergov boshqarmasi ish yurituviga topshirildi. Tergov natijasiga ko‘ra, har ikkala tomonning harakatlariga qonuniy baho berilishi taʼminlanadi”, — deyiladi xabarda.