"Eron bitta yadroviy bomba ustida to‘xtab qolmaydi"
Isroil Eron beshta yadroviy bomba yarata oladi, deb hisoblaydi.
Eron tomonidan to‘plangan uran miqdori beshta yadroviy bomba uchun yetarli. Bu haqda Isroil mudofaa vaziri Yoav Galant maʼlum qildi.
"Xato qilmang — Eron bitta yadroviy bomba ustida to‘xtab qolmaydi. Endi Eron 20 % va 60 % gacha boyitilgan material oldi, bu beshta yadroviy bomba uchun yetarli", — dedi Galant gretsiyalik hamkasbi bilan Afinaga tashrifi chog‘ida.
Uning taʼkidlashicha, uranni 90 foizgacha boyitish Eron tomonidan "jiddiy xato" bo‘ladi.
Taxminlarga ko‘ra, Eron haligacha uranni yadroviy qurol uchun zarur bo‘lgan 90% soflik darajasida boyitgani yo‘q, ammo agar xohlasa, buni tezda amalga oshirishi mumkin.
Eslatib o‘tamiz, AQSH Eron bir necha oy ichida yadro qurolini yaratishi mumkinligini aytgan edi. Qo‘shma Shtatlar Tehron yadroviy bomba yaratishga qaror qilsa, nima qilish kerakligi haqida bir nechta variantni ishlab chiqqan.
