Farg‘onada bolalar psixotrop dori bilan ushlangani aytildi
Holat bo‘yicha viloyat IIB munosabat bildirdi.
Ijtimoiy tarmoqlarda 15-18 yoshdagi qiz va yigitlarning psixotrop moddalar bilan ushlanganligi haqidagi video tarqaldi. Holat yuzasidan Farg‘ona viloyat IIB maʼlumot berdi.
Maʼlum bo‘lishicha, 22 aprel kuni Oltiariq tumani Jarqo‘rg‘on MFYda yashovchi fuqaro M.U 102 raqamiga murojaat qilib, shu mahalladagi o‘ziga tegishli bo‘lgan bog‘ shiyponiga nomaʼlum shaxslar janjal qilib, kirib olganligini maʼlum qilgan.
Yuqoridagi manzilga profilaktika inspektorlari yetib borishganda u yerda shu tumanda istiqomat qiluvchi F.M., J.O. hamda voyaga yetmaganlar M.R. va B.A.lar bor ekanligi aniqlangan. Ularga nisbatan Maʼmuriy javobgarlik to‘g‘risidagi kodeksning 45,183-moddalari bilan hujjatlar rasmiylashtirilgan va jinoyat ishlari bo‘yicha Oltiariq tumani sudiga yuborilgan.
Sud tomonidan 04 may kuni ularning 2 nafariga yuqoridagi moddalarga asosan bazaviy hisoblash miqdorining 3 barobari miqdorida jarima jazosi tayinlangan.
Shuningdek, fuqaro F.M. tuman IIBga murojaat qilib, ushbu videoni ijtimoiy tarmoqlarga tarqatgan shaxsni aniqlab, qonuniy chora ko‘rishni so‘ragan. Videotasvirlarni tarqatgan H.H. aniqlanib, unga nisbatan Maʼmuriy javobgarlik to‘g‘risidagi kodeksning 46 prim 2-moddasi bilan hujjatlar rasmiylashtirilgan hamda sud tomonidan BHMning 3 barobar miqdorida jarima jazosiga tortilgan.
“Yuqoridagi shaxslarning yonini ko‘zdan kechirish jarayonida psixotrop moddalar yoki sovuq qurollar aniqlanmaganligini ham maʼlum qilamiz”, — deyiladi xabarda.
