Buxoroda soxta tibbiyot instituti xodimi ushlandi
U o‘qishni “perevod” qilib berish evaziga pora olgan.
Buxoro shahrida talabaning o‘qishini boshqa OTMga ko‘chirib berish uchun pora olayotgan shaxs qo‘lga tushdi. Bu haqda IIV axborot xizmati xabar bermoqda.
Maʼlum bo‘lishicha, 1987 yilda tug‘ilgan K.M. o‘zini Buxoro tibbiyot instituti xodimi sifatida tanishtirib, bir fuqaroning o‘qishini Buxoro davlat universitetidan Buxoro tibbiyot institutiga ko‘chirib berish evaziga 2022 yil may oyidan avgust oyiga qadar bo‘lgan vaqt oralig‘ida aldov yo‘li bilan 4.000 AQSH dollarini olgan. Shundan so‘ng u talabaning o‘qishini ko‘chirib bermasdan, pullarni o‘z ehtiyojlari uchun sarflab yuborgan.
Mazkur holat yuzasidan Jinoyat kodeksining 168-moddasi 3-qismi bilan jinoyat ishi qo‘zg‘atilib, hozirgi kunda dastlabki tergov harakatlari olib borilmoqda.
